Salmos en Ladino 1 - 30
EL LIVRO DE LOS SALMOS
Trazladado en la lingua espanyola
(sigun le edision de Boyadjiyan – Konstantinopla 1885)
transliterasion a letras latinas – Eliezer Papo
salmo 1
1 BIENAVENTURADO EL VARON
KE NON ANDUVO EN KUNSEJO DE MALOS,
NI EN KAMINO DE PIKADORES SE PARO,
NI EN ASYENTO DE BURLADORES SE ASENTO.
2 SINO EN LA LEY DE ADONAY ESTA SU VELUNTAD,
I EN SU LEY PINSA DE DIA I DE NOCHE.
3 I SERA KOMO UN ARVOL PLANTADO DJUNTO A LAS
KORYENTES DE AGVAS,
KE DA SU FRUTO EN SU TIEMPO,
I SU OJA NO KAYIRA,
I TODO LOKE AZE PROSPERARA.
4 NO ANSI LOS MALOS,
SINO KOMO EL TAMO KE EMPOSHA EL VIENTO.
5 POR TANTO NO SE LEVANTARAN LOS MALOS EN EL DJUISIYO,
NI LOS PIKADORES EN LA KOMPANIA DE LOS DJUSTOS.
6 PORKE KONOSE ADONAY EL KAMINO DE LOS DJUSTOS,
MA EL KAMINO DE LOS MALOS SE DEPERDERA
salmo 2
1 POR KE SE REBUELVEN LAS DJENTES,
I LAS NASIONES PINSAN VANIDAD.
2 SE PARAN LOS REYES DE LA TIERA,
I LOS PRINSIPES SE AKONSEJAN AUNA
KONTRA ADONAY, I KONTRA SU AUNTADO, diziendo:
3 ARANKEMOS SUS ATADORAS,
I ECHEMOS DE NOZOTROS SUS KUERDAS.
4 EL KE ESTA ASENTADO EN LOS SIELOS SE REIRA,
EL SINYOR SE BURLARA DE EYOS.
5 INTONSES LES AVLARA EN SU FOLOR,
I EN SU IRA LOS TORVARA.
6 MA YO UNTI A MI REY - SOVRE SION, MI MONTE SANTO.
7 REKONTARE EL FUERO. - ADONAY MI DISHO
MI IJO ERES TU, - YO OY TE ENDJENDRI.
8 DIMANDA DE MI, - I DARE LAS DJENTES POR TU ERIDAD,
I POR TU POSESION LOS KAVOS DE LA TIERA.
9 LOS KEVRANTARAS KON VARA DE FIERO,
KOMO ATUENDO DE OLIERO LOS DESPIDASARAS.
10 I AGORA, REYES, ENTENDID,
SED KASTIGADOS, DJUEZES DE LA TIERA.
11 SERVID A ADONAY KON TEMOR,
I ESPAVORESIDVOS KON TEMBLOR.
12 BEZAD AL IJO, - NO SEYA KE SE ENSANYE,
I VOS DEPERDASH en el KAMINO,
KVANDO SE ENSENDYERE KOMO POKO SU FOLOR.
BIENAVENTURADOS TODOS LOS KE SE ABRIGAN EN EL!
salmo 3
1 SALMO DE DAVID, KVANDO FUYO DE DELANTE DE AVSAHALOM
2 O ADONAY! KVANTO SE MUCHIGVARON MIS ANGUSTIADORES!
MUCHOS SE LEVANTAN KONTRA MI.
3 MUCHOS DIZEN DE MI ALMA:
NO AY SALVASION PARA EL EN EL DIO. SELA.
4 MA TU, ADONAY, ERES ESKUDO PARA MI,
MI ONRA, I EL KE ENALTESE MI KAVESA.
5 KON MI BOZ YAMI A ADONAY,
I MI RISPONDYO DE SU MONTE SANTO. SELA.
6 YO YAZI, I DURMI;
ME DESPERTI; PORKE ADONAY ME SUSTUVO.
7 NO TEMERE DE MILARIYAS DE PUEVLO
KE SE PONEN AL DIRIDOR KONTRA MI.
8 LEVANTATE, ADONAY; - SALVA ME, DIO MIO;
PORKE TU ERISTE A TODOS MIS ENEMIGOS sovre LAZ
KESHADA
LOS DIENTES DE LOS MALOS KEVRASTE.
9 DE ADONAY ES LA SALVASION;
SOVRE TU PUEVLO TU BENDISION. SELA.
salmo 4
1 AL PRIMER KANTADOR KON NEGINOT, SALMO DE DAVID.
2 KVANDO YAMO, RISPONDIME, O DIO DE MI DJUSTIDAD!
EN LA ANGUSTIA ENSANDJASTE PARA MI;
APIADATE DE MI, I OYE MI ORASYON.
3 IJOS DE OMBRE, ASTA KVANDO tornaresh MI ONRA
EN VIRGUENSA,
i AMARESH VANIDAD, i BUSHKARESH MINTIRA? SELA.
4 SAVED PUES KE APARTO ADONAY AL BUENO PARA SI;
ADONAY OYIRA KVANDO YAMO A EL.
5 ESTRIMESIDVOS, I NO PEKESH;
AVLAD EN VUESTRO KORASON SOVRE VUESTRA KAMA,
I KAYADVOS. SELA.
6 SAKRIFIKAD SAKRIFISIOS DE DJUSTIDAD,
I ENFIGUZYADVOS EN ADONAY.
7 MUCHO DIZEN: KIEN MOS MOSTRARA BIEN?
ALSA SOVRE NOZOTROS LA LUZ DE TUS PASES, O ADONAY!
8 DESTE ALEGRIA EN MI KORASON,
MAS KE AL TIEMPO KE SU SEVERA I SU MOSTO SE MUCHIGVARON.
9 EN PAZ AUNA YAZIRE I DURMIRE;
PORKE TU, ADONAY, SOLO ME AZES ESTAR A FIGUZYA.
salmo 5
1 AL PRIMER KANTADOR SOVRE NEHILOT, SALOMO DE DAVID.
2 ESKUCHA MIS DICHOS, O ADONAY!
ENTIENDE MI PINSAMIENTO.
3 ESKUCHA LA BOZ DE MI ESKLAMASION, REY MIO, I
DIO MIO;
PORKE A TI ARE ORASION.
4 O ADONAY! EN LA MANYANA OIRA MI BOZ;
EN LA MANYANA me PREZENTARE A TI, I ESPERARE.
5 PORKE TU NO ERES DIO KE ENVELUNTAS EN MALDAD;
EL MALO NO MORARA KONTIGO.
6 NO SE PARARAN LOS SUVERBIOS DELANTE DE TUS OJOS;
AVURESES A TODOS LOS KE OVRAN TORTURA.
7 DISTRUIRAS A LOS KE AVLAN MINTIRA;
AL VARON DE SANGRES I DE ENGANYO ABURESERA ADONAY.
8 MA YO, EN LA MUCHIDUMBRE DE TU MERSED ENTRARE EN
TU KAZA;
ME ENKOVARE EN TU TEMPLO SANTO EN TU TEMOR.
9 O ADONAY! GIYAME EN TU DJUSTIDAD A KAVZA DE MIS
ENEMIGOS;
ADERESA DELANTE DE MI TU KAMINO.
10 PORKE NO AY EN SU BOKA FIELDAD;
SUS ENTRANYAS SON TORTURAS;
FUESA AVIERTA ES SU GARGANTA;
KON SU LENGVA LIZONJIAN.
11 TEN LOS POR KULPOZOS, O DIO!
KAYGAN POR SUS KUNSEJOS;
POR LA MUCHIDUMBRE DE SUS REVELIOS EMPOSHALOS;
PORKE REVELIARON KONTRA TI.
12 I SE ALEGREN TODOS LOS KE SE AVRIGEN EN TI;
PARA SIEMPRE KANTEN, PORKE TU LOS MAMPARAS;
I SE GOZEN EN TI LOS KE AMAN TU NOMBRE.
13 PORKE TU BENDIZIRAS AL DJUSTO, O ADONAY!
KOMO KON ADARGA LO RODIARAS KON FAVOR.
salmo 6
1 AL PRIMER KANTADOR KON NEGINOT, SOVRE SHEMINIT,
SALMO DE DAVID.
2 O ADONAY! NO ME RAZONES EN TU FOLOR,
NI ME KASTIGES EN TU SANYA.
3 APIADATE DE MI, O ADONAY! PORKE ESROY ENFLAKESIDO;
SANAME, O ADONAY! PORKE MIS GUESOS ESTAN TURVADOS.
4 I MI ALMA ESTA TURVADA MUCHO;
I TU, O ADONAY! ASTA KVANDO?
5 TORNATE, O ADONAY! ESKAPA MI ALMA;
SALVAME POR AMOR DE TU MERSED.
6 PORKE EN LA MUERTE NO AY MEMBRASION DE TI;
EN LO FOYA KIEN TE LOARA?
7 ME KANSI KON SUSPIRO;
AGO NADAR MI KAMA KADA NOCHE;
KON MIS LAGRIMAS ARIGO MI LECHO.
8 MI OJO ESTA KONSUMIDO DE TRISTEZA;
SE ENVIJESYO A KAVZA DE TODOS MIS ANGUSTYADORES.
9 APARTADVOS DE MI, TODOS LOS OVRADORES DE TORTURA;
PORKE OYO ADONAY LA BOZ DE MI YORO.
10 OYO ADONAY MI ROGATIVA; - ADONAY RESIVIRA MI ORASION.
11 SEAN AVIRGONSADOS I SEAN TURVADOS MUCHO TODOS MIS
ENIMIGOS;
TORNEN atras, SEAN AVIRGUNSADOS SUBITO.
salmo 7
1 SHIGAYON DE DAVID, KE KANTO A ADONAY TOKANTE A LAS PALAVRAS DE KUSH, VARON DE BENYAMIN
2 O ADONAY DIO MIO! EN TI MI AVRIGO;
SALVA ME DE TODOS MIS PERSEGIDORES, I ESKAPAME;
3 NO SEA KE ARIVATO KOMO LEON MI ALMA,
DESPIDASANDO, I NO AYGA KIEN me ESKAPE.
4 O ADONAY DIO MIO! SI YO IZI ESTO,
SI AY TORTURA EN MIS MANOS:
5 SE GVALARDONE MAL AL APAZIGVADO KONMIGO,
O ESPOJI A EL KE ME ANGUSTYO SIN KAVZA:
6 PERSEGA EL ENEMIGO A MI ALMA, I la ALKANSI,
I FIZI EN LA TIERA MI VIDA, I A MI ONRA PONGA EN PULVO. SELA.
7 LEVANTATE, O ADONAY! EN TU FOLOR;
ENSHALSHATE A KAVZA DE LA SANYA DE MIS ANGUSTYADORES,
I DISPIERTATE POR MI al DJUISIO ke ENKOMENDASTE.
8 I LA KOMPANIA DE NASIONES TE RODIARA;
I POR KAVZA DE EYA TORNATE A LO ALTO.
9 ADONAY DJUZGARA LOS PUEVLOS.
I SEGUN MI PRINSIMIDAD ke ay EN MI.
10 SE AKAVE AGORA LA MALISIYA DE LOS MALOS,
I KONFIRMA AL DJUSTO;
PORKE PREVAS LOS KORASONES I LOS RINYONES, o DIO DJUSTO!
11 MI ESKUDO es EN EL DIO,
KE SALVA A LOS DERECHOS DE KORASON.
12 EL DIO ES DJUEZ DJUSTO,
I EL DIO ESTA AERADO kon el malo KADA DIA.
13 SI NO TORNARE, ESMOLARA SU ESPADA;
ESTERO SU ARKO, I LO APAREJO.
14 I PARA EL APAREJO ARMAS DE MUERTE;
AZE ARDIENTES SUS SAETAS.
15 EK, el malo SE ADOLORIYA DE TORTURA,
I SE ENSENTO DE LAZIRIYA, I PARYI FALSIDAD.
16 TAJO UN POZO, I LO KAVO;
I KAYO EN LA FOYA KE IZO.
17 SE TORNARA SU LAZIRIYA SOVRE SU KAVESA,
I SOVRE SU MEOYRA SU ADOLME DESENDERA.
18 LOARE A ADONAY SEGUN SU DJUSTIDAD,
I SALMIYARE AL NOMBRE DE ADONAY EL ALTISIMO.
salmo 8
1 AL PRIMER KANTADOR SOVRE GITIT, SALMO DE DAVID.
2 O ADONAY NUESTRO SINYOR!
KVAN GLORIOZO ES TU NOMBRE EN TODA LA TIERA!
KE POZISTE TU LOOR SOVRE LOS SIELOS.
3 DE LA BOKA DE CHIKITOS I MAMANTES
ASEMENTASTE FORTALEZA A KAVZA DE TUS ENEMIGOS,
PARA BALDAR AL ENEMIGO I AL VENGADOR.
4 KVANDO VEO TUS SIELOS, OVRA DE TUS DEDOS,
LA LUNA I LAS ESTREYAS KE TU KOMPOZISTE, digo:
5 KE ES EL OMBRE KE TE AKORDAS DE EL,
I EL IJO DE OMBRE KE LO VIJITAS?
6 I LO IZISTE POKO MENOR KE LOS ANDJELES,
I DE ONRA I DE ERMOZURA LO ENKORONASTE.
7 LO IZISTE PODESTAR SOVRE LAS OVRAS DE TUS MANOS;
TODO LO POZISTE DEBASHO DE SUS PIES:
8 UVEJAS I BUEYES, TODOS EYOS,
I TAMBIEN LAS KVATROPIAS DEL KAMPO;
9 LAS AVES DE LOS SIELOS, I LOS PESHES DE LA MAR,
todo lo ke PASA POR LOS SENDEROS DE LAS MARES.
10 O ADONAY NUESTRO SINYOR!
KVAN GLORIYOZO ES TU NOMBRE EN TODA LA TIERA!
salmo 9
1 AL PRIMER KANTADOR SOVRE MUT-LAVAN, SALMO DE DAVID.
2 LOARE A ADONAY KON TODO MI KORASON;
REKONTARE TODAS TU MARAVIYAS.
3 ME ALEGRARE I ME GOZARE EN TI;
SALMIARE A TU NOMBRE, O ALTISIMO!
4 KVANDO MIS ENEMIGOS TORNAREN ATRAS,
SE ENTROPESARAN I SE DEPERDARAN DELANTE DE TI.
5 PORKE TU IZISTE MI DJUISIO I MI KAVZA;
TE ASENTASTE EN LA SIYA DJUZGANDO DJUSTIDAD.
6 KASTIGASTE DJENTES, - DESTRUISTE AL MALO,
AREMATASTE SU NOMBRE PARA SIEMPRE I SIEMPRE.
7 LAS DESOLASIONES DEL ENEMIGO SE AKAVARON PARA SIEMPRE;
I TU DEROKASTE SUS SIVDADES,
SE DEPERDYO SU MEMBRASION KON EYOS.
8 MA ADONAY ESTARA PARA SIEMPRE;
APAREJO PARA EL DJUESIO SU SIYA.
9 I EL DJUZGARA AL MUNDO KON DJUSTIDAD;
DJUZGARA A LAS NASIONES KON DERECHIDAD.
10 I SERA ADONAY MAMPARO AL OPREMIDO,
MAMPARO EN TIEMPO DE ANGUSTYA.
11 I SE ENFIGUZYARAN EN TI LOS KE KONOSEN TU NOMBRE;
PORKE NO DESHASTE A LOS KE TE BUSHKAN, O ADONAY!
12 SALMIAD A ADONAY KE MORA EN EL SION;
PUVLIKAD EN LOS PUEVLOS SUS OVRAS.
13 KVANDO REKIERE LAS SANGRES SE AKORDA DE EYOS;
NO SE ULVIDA DE LA ESKLAMASION DE LOS AFREIDOS.
14 TEN PIEDAD DE MI, O ADONAY!
MIRA MI AFRESION ke sufro DE LOS KE ME ABORESEN,
tu KE ME ENALTESES DE LAS PUERTAS DE LA MUERTE;
15 PARA KE YO REKONTE TODOS LOS LOORES
EN LAS PUERTAS DE LA IJA DE SION:
ME GOZARE EN TU SALVASION.
16 SE ONDIERON LAS DJENTES EN LA FOYA KE IZIERON:
EN LA RED KE ESKUNDIERON FUE PRENDIDO SU PIE.
17 ADONAY ES KONOSIDO por EL DJUISIO ke IZO;
EN LA OVRA DE SUS MANOS FUE ENKAMPADO EL MALO.
'IGAYON. SELA.
18 SERAN TORNADOS LOS MALOS AL ENFIERNO,
TODAS LAS DJENTES KE SE ULVIDAN DEL DIO.
19 PORKE NO PARA SIEMPRE SERA ULVIDADO EL MENESTEROZO,
NI LA ESPERANSA DE LOS PROVES SE DEPERDERA PARA SIEMPRE.
20 LEVANTATE, O ADONAY! NO SE SNFORTESKA EL OMBRE;
SEAN DJUZGADAS LAS DJENTES DELANTE DE TI.
21 O ADONAY! PON TEMOR EN EYOS;
KONOSKAN LAS DJENTES KE SON OMBRES. SELA
salmo 10
1 O ADONAY! PORKE TE PARAS DE LESHOS?
por ke TE ENKOVRES EN TIEMPOS DE LA ANGUSTYA?
2 KON LA ALTIGUEZA DEL MALO ES PERSEGIDO EL POVRE;
SEAN PRENDIDOS EN LOS ARTIFISIOS KE PENSARON.
3 PORKE SE ALAVA EL MALO DEL DEZEO DE SU ALMA;
EL KOVDISIOZO BENDIZE a si ; MENUSPRIYA A ADONAY.
4 EL MALO POR LA ALTIGUEZA DE SU KARA NO REKIERE al Dio;
ke NO AY DIO son TODOS SUS PENSAMIENTOS.
5 SUS KAMINOS ADOLORIAN EN TODO TIEMPO;
ALTOS SON TUS DJUISIOS, ALESHADOS DE ENFRENTE DE EL;
A TODOS SUS ENEMIGOS LOS MENOSPRESIYA.
6 DIZI EN SU KORASON: NUNKA SERE ESMOVIDO;
PORKE DE DJERENANSIO A DJERENANSIO NO SERE EN MAL.
7 SU BOKA ESTA YENA DE MALDISION, I DE ARTES I ENGANYO;
DEBASHO DE SU LENGVA LAZIRIYA I TORTURA.
8 SE ASENTA EN LAS ASILADAS DE LAS ALDIAS;
EN LOS LUGARES ENKUVIERTOS MATA AL INOSENTE;
SUS OJOS MIRAN A LAS ESKONDIDAS POR EL DESDECHADO.
9 ASELADA EN LA ENKUVIERTA KOMO LEON EN SU KAVANYA;
ASELADA PARA ARIVATAR AL POVRE;
AREVATA AL POVRE, SUNTRAYENDOLO EN SU RED.
10 SE ENKOJE I SE APREME,
I KAYEN LOS DESDECHADOS EN SUS manos FUERTES.
11 DIZE EN SU KORASON: EL DIO SE ULVIDO;
ENKUVRIO SUS PASES, NUNKA VERA.
12 LEVANTATE, O ADONAY! O DIO! ALSA TU MANO;
NO TE ULLVIDES DE LOS POVRES.
13 PORKE MENUSPRESIYA EL MALO AL DIO?
DIZE EN SU KORASON NO RIKERERAS.
14 TU VISTE; PORKE TU MIRAS LAZIRIYA I SANYA,
PARA DAR paga KON TU MANO:
SOVRE TI SE DESHA EL DESDECHADO;
DEL GUERFANO TU ERES AYUDADOR.
15 KEVRA EL BRASO DEL MALO;
KE AL MALO, REKIERE SU MALISIYA asta ke AYES mas.
16 ADONAY ES REY PARA SIEMPRE I SIEMPRE;
DE SU TIERA SE DEPERDIERON LAS DJENTES.
17 EL DEZEO DE LOS UMILDES OYISTE, O ADONAY!
KONFIRMARAS SU KORASON; - ARAS ESKUCHAR TU UREJA:
18 PARA DJUZGAR AL GUERFANO I AL OPRIMIDO,
PARA KE NO KONTTINUE MAS A KEVRANTAR EL OMBRE DE LA TIERA.
salmo 11
AL PRIMER KANTADOR. DE DAVID.
1 EN ADONAY MI AVRIGO; - KOMO DIZESH A MI ALMA:
ESMUVITE A VUESTRO MONTE komo PASHARO?
2 PORKE, EK, LOS MALOS ESTERAN ARKO;
APAREJAN SUS SAETAS SOVRELA KUERDA,
PARA TIRAR EN LA ESKURIDAD A LOS DERECHOS DE KORASON.
3 SI LOS SIMIENTOS FUEREN DEROKADOS,
KE PODRA AZER EL DJUSTO?
4 ADONAY esta EN SU TEMPLO SANTO;
ADONAY tiene EN LOS SIELOS SU SIYA;
SUS OJOS VEN, SUS PARPAROS PREVAN A LOS IJOS DE OMBRE.
5 ADONAY PREVA AL DJUSTO;
MA AL MALO I A EL KE AMA ADOLME AVORESE SU ALMA.
6 SOVRE LOS MALOS ARA YUVIR LAZOS,
FUEGO I ASHUFRE , I VIENTO ARDIENTE;
esto sera LA PORSION DE SU VAZO.
7 PORKE EL DJUSTO ADONAY AMA DJUSTIDAD;
AL DERECHO MIRA SU KARA.
salmo 12
1 AL PRIMER KANTADOR SOVRE SHEMINIT, SALMO DE DAVID.
2 SALVA, O ADONAY! PORKE SE AKAVO EL BUENO;
PORKE SE MINGVARON LOLS FIELES DE ENTRE LOS IJOS DE OMBRE.
3 VANIDAD AVLAN KADA UNO KON SU KOMPANIERO;
KON LAVYOS LIZONJEROS, KON KORASON DUBLE AVLAN.
4 TAJARA ADONAY TODOS LAVYOS LIZONJEROS,
LA LENGVA KE AVLA GRANDEZAS:
5 KE DIZEN: POR NUESTRA LINGVA MAYORGAREMOS;
NUESTROS LAVYOS SON KON NOZOTROS;
KIEN ES SINYOR A NOZOTROS?
6 POR EL ESPOJO DE LOS POVRES, POR EL DJIMIDO DE
LOS MINISTEROZOS, AGORA ME LAVANTARE, DIZE ADONAY;
PONDRE EN SALVASION A EL A KIEN MENUSPRIYAN.
7 LOS DICHOS DE ADONAY SON DICHOS LIMPIOS,
komo PLATA EZMERADA EN KRIZOL DE TIERA, REFINADA SIETI VEZES.
8 TU, ADONAY, LOS GVARDARAS;
LOS GVARDARAS DE ESTE DJERENANSIO PARA SIEMPRE.
9 AL DIRIDOR ANDAN LOS MALOS,
MIENTRAS KE SON ENSHALSADOS LOS MAS VELES DE LOS
IJOS DEL OMBRE.
salmo 13
1 AL PRIMER KANTADOR, SALMO DE DAVID
2 ASTA KVANDO, O ADONAY! ME ULVIDARAS PARA SIEMPRE?
ASTA KVANDO ENKUVRIRAS TUS FASES ENFRENTE DE MI?
3 ASTA KVANDO PONDRE KUNSEJOS EN MI ALMA,
kon ANSIYA EN MI KORASON IKADA DIA?
ASTA KVANDO SE ENALTESERA MI ENEMIGO SOVRE MI?
4 MIRA, RISPONDIMI, O ADONAY DIO MIO!
ALUMBRA MIS OJOS, PARA KE NO DUERMA DE MUERTE:
5 PARA KE NO DIGA MI ENEMIGO: LO VINSI:
i MIS ANGUSTYADORES SE ALEGREN KVANDO ME ESMUVIRE.
6 MA YO EN TU MERSED ME ENFIGUZYO;
SE ALEGRARA MI KORASON EN TU SALVASION.
KANTARE A ADONAY, - PORKE ME GVALARDONO.
salmo 14
AL PRIMER KANTADOR, DE DAVID.
1 DISHO EL NESIYO EN SU KORASON: NO AY DIO.
SE DANYARON; IZIERON OVRAS ABOMINAVLES;
NO AY KIEN AGA BIEN.
2 ADONAY MIRO DE LOS SIELOS SOVRE LOS IJOS DE OMBRE,
PARA VER SI AY KIEN ENTIENDA, - KIEN BUSHKE AL DIO.
3 TODOS SE APARTARON; - AUNA SE DANYARON;
NO AY KIEN AGA BIEN; - NO AY TAMBIEN NI UNO.
4 NO KONOSIERON TODOS LOS OVRADORES DE TORTURA,
KE KOMEN A MI PUEVLO, komo SI KOMIERAN PAN?
A ADONAY NO YAMARON.
5 AYI SE ESFAVORESIERON DE FAVOR;
PORKE EL DIO ESTA KON EL DJERENANSIO DE LOS DJUSTOS.
6 EL KUNSEJO DE POVRE AVIRGUENSASTESH,
PORKE ADONAY ES SU AVRIGO.
7 KIEN DYESI DE SION SALVASION DE ISRAEL!
EN TORNANDO ADONAY KATIVERIO DE SU PUEVLLO,
SE GOZARA YAAKOV, SE ALEGRARA ISRAEL.
salmo 15
SALMO DE DAVID
1 O ADONAY! KIEN MORARA EN TU TIENDA?
KIEN POZARA EN TU MONTE SANTO?
2 EL KE ANDA EN PRENEZMIDAD, I OVRA DJUSTIDAD,
I AVLA VERDAD EN SU KORASON:
3 el ke NO MALSINA KON SU LENGVA,
NI AZE MAL A SU KOMPANIERO,
NI RESIVE REPODIO KONTRA SU VIZINO:
4 EN OJOS DE KVAL ES MENUSPRIYADO EL VEL,
MA ONRA A LOS KE TEMEN A ADONAY;
el ke DJURA, I aunke le salga DANYO, NO TROKA:
5 el ke NO DA SU MONEDA KON LOGRO,
NI TOMA REGALO KONTRA EL INOSENTE,
EL KE AZE ESTAS kozas NO SERA ESMOVIDO PARA SIEMPRE.
salmo 16
MIHTAM DE DAVID
1 GVARDA ME, O DIO! - PORKE EN TI MI AVRIGO.
2 o alma mia! DESHASTE A ADONAY: TU ERES MI SINYOR;
NO TENGO BIEN SINO EN TI.
3 A LOS SANTOS KE ESTAN EN LA TIERA, I LOS ONRADOS,
TODA MI VELUNTAD ESTA EN EYOS.
4 SE MUCHIGVARON LAS TRISTEZAS DE LOS KE SE
APRESURAN detras de OTRO dio.
NO TEMPLARE SUS TEMPLASIONES DE SANGRE,
NI TOMARE SUS NOMBRES EN MIS LAVYOS.
5 ADONAY ES LA PORSION DE MI ERIDAD I DE MI VAZO;
TU SUSTIENES MI SUERTE.
6 LAS SUERTES ME KAYERON EN lugares DELISIOZOS;
TAMBIEN ERIDAD ERMOZA AY PARA MI.
7 BENDIZIRE A ADONAY, KE ME AKONSEJO;
TAMBIEN A LAS NOCHES ME AKAVIDAN MIS RINYONES.
8 POZI A ADONAY DELANTE DE MI DE KONTINO;
PORKE el esta A MI DERECHA, NO SERE ESMOVIDO.
9 POR TANTO SE ALEGRE MI KORASON, I SE GOZA MI ONRA;
TAMBIEN MI KARNE REPOZARA EN FIGUZYA.
10 PORKE NO DEHARAS MI ALMA EN LA FOYA,
NI DESHARAS A TU BUENO A VER PODRESION.
11 ME ARAS SAVER EL SENDERO DE LA VIDA;
ARTURA DE ALEGRIAS AY EN TU PREZENSIA,
DELISIAS A TU DERECHA PARA SIEMPRE.
salmo 17
ORASION DE DAVID.
1 OYE, O ADONAY! LA DJUSTIDAD;
ESKUCHA MI ESKLAMASION;
AKOSTA TU UREJA A MI ORASION,
ke ago SIN LAVYOS DE ENGANYO.
2 DE DELANTE DE TI SALGA MI DJUISIO;
VEAN TUS OJOS DERECHIDADES.
3 PREVASTE MI KORASON, me VIJITASTE DE NOCHE;
ME IZMIRASTE; NO AYARAS nada;
ME DETERMINI KE MI BOKA NO TRASPASARA.
4 EN KVANTO A LAS OVRAS DEL OMBRE,
POR LA PALAVRA DE TUS LAVYOS YO me GVARDI de LOS
SENDEROS DEL DESTRUIDOR.
5 SUSTEN MIS PASOS EN TUS SENDEROS,
PARA KE NO SE RISFOYGAN MIS PATADAS.
6 YO TE YAMI, PORKE ME RISPONDIRAS, O DIO!
AKOSTA TU UREJA A MI, OYE MI DICHO.
7 AZ MARAVIOZAS TUS MERSEDES.
tu KE SALVAS KON TU DERECHA A LOS KE SE AVRIGAN en ti
DE LOS KE SE LEVANTAN kontra eyos.
8 GVARDA ME KOMO LA NINYETA DEL OJO;
EN LA SOLOMBRA DE TUS ALAS ESKONDIME,
9 DE LAS FASES DE LOS MALOS KE ME DISTRUYEN,
de MIS ENEMIGOS ke ME RODIAN POR LA VIDA.
10 KON SU GROSURA ESTAN SERADOS;
KON SU BOKA AVLAN ALTIGUEZA.
11 EN NUESTROS PASOS AGORA NOS RODIAN;
PONEN SUS OJOJ PARA ECHARnos A TIERA.
12 SE ASIMIJAN AL LEON KE DEZEA A ARIVATAR,
I AL LEONIKO ASENTADO EN LUGARES ESKONDIDOS.
13 LEVANTATE, O ADONAY! AKONANTA SUS FASES, ECHALO ABASHO;
ESKAPA MI ALMA DEL MALO kon TU ESPADA:
14 DE VARONES kon TU MANO, O ADONAY!
DE VARONES DEL MUNDO, ke SU PARTE ES EN esta VIDA,
I DE TU TEZORO ESKONDIDO ENCHES SU VIENTRE;
SE ARTAN sus IJOS, I DEHSAN SU SOVRAJE A SUS CHIKITIKOS.
15 YO EN DJUSTIDAD VERE TUS FASES;
KVANDO ME DESPERTARE, ME ARTARE DE SU SIMIJANSA.
salmo 18
1 AL PRIMER KANTADOR. DE DAVID, SIERVO DE ADONAY,
KE AVLO A ADONAY LAS PALAVRAS DE ESTA KANTIGA EN EL DIA
KE ADONAY LO ESKAPO DE MANO DE TODOS SUS ENEMIGOS,
I DE MANO DE SHAUL. I DISHO:
2 TE AMARE, O ADONAY! MI FORTALEZA.
3 ADONAY ES MI PINYA, I MI KASTIYO, I MI ESKAPADOR,
MI DIO, MI PINYASKO; ME AVRIGARE EN EL;
MI ESKUDO, I EL KUERNO DE MI SALVASION,
MI FORTTALEZA ALTA.
4 YAMARE A ADONAY, el kval ES ALAVADO,
I SERE SALVO DE MIS ENEMIGOS.
5 ME RODIARON DOLORES DE LA MUERTE,
I AROYOS DE MALDAD ME TURVARON
6 DOLORES DE LA FOYA ME RODIARON;
ME AKONANTARON LAZOS DE MUERTE.
7 EN MI ANGISTYA YAMI A ADONAY,
I A MI DIO ESKLAMI;
EL DE SU TEMPLO OYO MI BOZ,
I MI ESKLAMASION VINO DELANTE DE EL, EN SUS UREJAS.
8 I SI KONMOVYO I TEMBLO LA TIERA;
I LOS SIMIENTOS DE LOS MONTES SE ESTREMESIERON,
I SE KONMOVIERON, PORKE EL SE AERO.
9 SUVYO UMO DE SU NARIZ, - I DE SU BOKA FUEGO KONSUMIO;
BRAZA SE ENSENDIERON DE EL.
10 I AKOSTO LOS SIELOS, I DESENDIO;
I TENYEVLAS DE BASHO DE SUS PIES.
11 I KAVAYO SOVRE KERUV, I BOLO;
I BOLO SOVRE LAS ALAS DEL VIENTO.
12 POZO ESKURIDAD por SU ESKONDEDIJO;
SU KAVANYA AL DIRIDOR DE SI, ESKURIDAD DE AGVAS,
NOVES DE LOS SIELOS.
13 POR EL RESPLANDOR DELANTE DE EL SUS NOVES PASARON,
PEDRESKO I BRAZAS DE FUEGO.
14 I TRONO EN LOS SIELOS ADONAY,
I EL ALTISIMO DYO SU BOZ,
PEDRESKO I BRAZAS DE FUEGO.
15 I ENVIO SUS SAETAS, I LOS ESPARZYO;
I MUCHIGVO RELAMPAGOS, I LOS ALBOROTO.
16 I SE APARESIERON LOS MANADEROS DE LAS AGVAS,
I FUERON DISKUVIERTOS LOS SIMIENTOS DEL MUNDO
POR TU AMENAZA, O ADONAY!
POR EL SUFRO DEL REFLO DE TU FOLOR.
17 ENVIO DE LO ALTO, ME TOMO; - ME SAKO DE AGVAS MUCHAS.
18 ME ESKAPO DE MI ENEMIGO FUERTE,
I DE MIS ABURESIDORES; PORKE ERAN MAS FUERTES KE YO.
19 ME AKONANTARONN EN EL DIA DE MI DISGRASIA;
MA ADONAY FUE POR ASUFRENSIA A MI.
20 I ME SAKO A LA ANCHURA;
ME ESKAPO, PORKE ENVELUNTO EN MI.
21 ME GVALARDONO ADONAY SEGUN MI DJUSTIDAD;
SEGUN LA LIMPIEZA DE MIS MANOS ME PAGO.
22 PORKE GVARDI LOS KAMINOS DE ADONAY,
I NO IZI MALDAD KONTRA MI DIO.
23 PORKE TODODS SUS DJUISIOS gvardi DELANTE DE MI,
I SUS FUEROS NO APARTI DE MI
24 I YO FUE PRENEZMO KON EL, - I ME GVARDI DE MI DELITO.
25 I MI PAGO ADONAY SEGUN MI DJUSTIDAD,
SEGUN LA LIMPIEZA DE MIS MANOS DELANTE DE SUS OJOS.
26 KON EL PIADOZO SERAS PIADOZO,
KON EL VARON PRENEZMO SERAS PRENEZMO.
27 KON EL LIMPIO SERAS LIMPIO,
I KON EL TUERTO SERAS KONTRARIO.
28 PORKE TU AL PUEVLO POVRE SALVARAS,
I LOS OJOS ALTIGVOS ABASHARAS.
29 PORKE TU ALUMBRARAS MI LAMPARA;
ADONAY MI DIO ESKLARESERA MI ESKURIDAD.
30 PORKE KONTIGO KORO en FONSADO;
I POR MI DIO SALTO LA MORAYA.
31 EL DIO, PRENEZMO ES SU KAMINO;
EL DICHO DE ADONAY ES IZMIRADO;
ESKUDO ES A TODOS LOS KE SE ARIGEN EN EL.
32 PORKE KIEN ES DIO AFUERA DE ADONAY?
I KIEN ES PINYA AFUERA DE NUESTRO DIO?
33 EL DIO ES KE ME SENYE DE FUERSA,
I AZE PRENIZMO MI KAMINO.
34 EL AZE MIS PIES KOMO DE SIERVAS,
I ME ASENTA SOVRE MIS ALTURAS.
35 EL ANBIZA MIS MANOS PARA LA PELIYA;
I EL ARKO DE AZER ES KEVRADO POR MIS BRASOS.
36 I ME DESTE EL ESKUDO DE TU SALVASION,
I TU DERECHA ME ASFRIO, I TU UMILDAD ME ENGRANDESIO.
37 ENSACHASTE MIS PASOS DEBASHO DE MI,
I NO SE RESFUYERON MIS RUDIYAS.
38 PERSIGI A MIS ENEMIGOS, I LOS ALKANSI;
I NO TORNI ASTA ATEMARLOS.
39 LOS YAGI, I NON PODIERON LEVANTARSE,
KAYERON DEBASHO DE MIS PIES.
40 I ME SENYISTE DE FUERSA PARA LA PELIYA;
SUCHIFITASTE DEBASHO DE MI A LOS KE SE LEVANTARON
KONTRA MI.
41 I IZISTE KE MIS ENEMIGOS ME DIERAN LA ESPALDA;
I A MIS ABORESIDORES LOS TAJI.
42 ESKLAMARON, MA NO UVO KIEN los SALVARA;.
A ADONAY, MA NO LES RISPONDIO.
43 I LOS MULI KOMO PULVO DELANTE DEL VIENTO;
KOMO LODO DE LAS KAYES LOS ECHI.
44 ME ESKAPASTE DE LAS BARAJAS DEL PUEVLO;
ME POSISTE POR KAVESERA DE DJENTES;
PUELVO KE YO NO KONOSI ME SERVIERON.
45 EN OYENDO KON LA UREJA ME OVEDESIERON;
LOS ESTRANYOS SE SOCHIFTARON A MI.
46 LOS ESTRANYOS SE DESKAYERON,
I SE ESTRTEMESIERON EN SUS ENSERAMIENTOS.
47 BIVO ADONAY, I BINDICHA SEYA MI PINYA;
I SEYA ENALTESIDO EL DIO DE MI SALVASION.
48 EL DIO ES KE ME DA VENGANSAS,
I SUCHEFTA PUEVLOS DEBASHO DE MI.
49 ME ESKAPA DE MIS ENEMIGOS.
TAMBIEN ME ENALTESESTE SOVRE LOS KE SE YAMARON
KONTRA MI; DEL VARON DE ADULME ME ESKAPASTE.
50 POR TANTO TE LOARE ENTRE LAS DJENTES, O ADONAY!
I SALMIYARE A TU NOMBRE.
51 EL ENGRANDESE LAS SALVASIONES DE SU REY,
I AZE MERSED A SU UNTADO,
A DAVID I A SU SEMEN PARA SIEMPRE.
salmo 19
1 AL PRIMER KANTADOR, SALMO DE DAVID.
2 LOS SIELOS REKONTAN LA ONRA DEL DIO,
I LA ESPANDIDURA DENUNSIA LA OVRA DE SUS MANOS.
3 DIA A DIA AVLA DICHO,
I NOCHE A NOCHE MOSTRA SAVER.
4 NO AY DICHO, I NO AY PALAVRAS;
NO ES OYIDA SU BOZ.
5 empero POR TAODA LA TIERA SALIO SU LINYA,
I AL KAVO DEL MUNDO SUS PALAVRAS.
PARA EL SOLO POZO TIENDA EN EYOS.
6 I EL ESKOOMO NOVIO KE SALE DE SU TALAMO;
SE ALEGRE KOMO BARAGAN PARA KORER
7 DEL KAVO DE LOS SIELOS ES SU SALIDA,
I SU RODIO ASTA EL otro KAVO DE EYOS;
I NO AY KOZA ESKUNDIDA DE SU KALOR.
8 LA LEY DE ADONAY ES KOMPLIDA, KE TORNA EL ALMA;
EL TESTIMONI DE ADONAY ES FIEL, KE AZE SAVIO AL TORPE.
9 LOS MANDAMIENTOS DE ADONAY SON DERECHOS,
KE ALEGRAN EL KORASON;
LA ENKOMENDANSA DE ADONAY ES KLARA, KE ALOMBRA LOS
OJOS.
10 EL TEMOR DE ADONAY ES LIMPIO, KE DURA PARA SIEMPRE;
LOS DJUISIOS DE ADONAY SON VERDAD, SON TODOS DJUSTOS
11 KOVDISIAVLES SON MAS KE ORO, I MAS KE MUCHO ORO FINO;
I DULSES MAS KE MIEL, I GOTA DE PANALES.
12 TAMBIEN POR EYOS ES AKAVIDAD TU SIERVO;
EN GVARDARLOS AY PRESIO GRANDE.
13 KIEN ENTIENDE sus YEROS?
DE LOS pikados ENKUVIERTOS ALIMPIAME.
14 TAMBIEN DE LOS pikados DE SOBERVIA DETEN A TU SIERVO;
NO PODESTEN SOVRE MI; ENTONSES SERE PRENEZMO,
I SERE INOSENTE I REVELIO GRANDE.
15 SEAN AGRADAVLES DELANTE DE TI
LOS DICHOS DE MI BOKA I EL PENSAMIENTO DE MI
KORASON O ADONAY! MI PINYA I REGMIDOR.
salmo 20
1 AL PRIMER KANTADOR, SALMO DE DAVID.
2 TE RESPONDA ADONAY EN EL DIA DE ANGUSTIA;
TE MAMPARE EL NOMBRE DEL DIO DE YAAKOV.
3 ENVIE TU AYUDA DEL SANTOVARIO,
I DE SION TE ASOFRA.
4 SE AKORDE DE TODOS TUS PREZENTES,
I RESIVA TU ALSASION. SELA.
5 TE DE SEGUN TU KORASON, - I KOMPLA TODO TU KUNSEJO.
6 KANTAREMOS POR TU SALVASION,
I EN EL NOMBRE DE NUESTRO DIO LEVANTAREMOS PENDON.
KOMPLA ADONAY TODAS TUS DEMANDAS.
7 AGORA YO SE KE SALVA ADONAY A SU UNTADO;
LE RISPONDIRA DE SUS SIELOS SANTOS
KON LAS BARAGANIAS DE LA SALVASION DE SU DERECHA.
8 ESTOS se konfian KVATRIGVAS, I AKEYOS EN
KAVAYOS;
MA MOZOTROS ENMENTAREMOS EL NOMBRE DE ADONAY
NUESTRO DIO.
9 EYOS SE ARODIARON I KAYERON;
MA NOZOTROS NOS LEVANTAMOS, I NOS PARAMOS.
10 O ADONAY! SALVA;
KE EL REY NOS RISPONDA EN EL DIA KE YAMAMOS.
salmo 21
1 AL PRIMER KANTADOR, SALMO DE DAVID.
2 O ADONAY! EN TU FORTALEZA SE ALEGRARA EL REY;
I EN TU SALVASION KVANTO SE GOZARA!
3 EL DEZEO DE SU KORASON LE DESTE,
I LA DIMANDA DE SUS LAVYOS NO le NIGASTE. SELA.
4 PORKE LO AKONANTASTE KON BENDISIONES DE BIEN;
POZISTE SOVRE SU KAVESA KORONA DE ORO FINO.
5 VIDA DIMANDO DE TI, i LE DESTE,
LONGURA DE DE DIAS PARA SIEMPRE I PARA SIEMPRE.
6 GRANDE ES SU ONRA EN TU SALVASION;
GLORIA I ERMOZURA POZISTE SOVRE EL.
7 PORKE LO IZISTE BINDICHO PARA SIEMPRE;
LO ALEGRASTE DE GOZO KON TUS FASES.
8 PORKE EL REY SE ENFIGUZIA EN ADONAY;
I POR LA MERSED DEL ALTISIMO NO SERA ESMUVIDO.
9 ALKANSARA TU MANO A TODOS TUS ENEMIGOS;
TU DERECHA ALKANSARA A LOS KE TE ABORESEN.
10 LOS PONDRAS KOMO ORNO FUEGO EN EL TIEMPO TU IRA;
ADONAY LOS ENGLUTERA EN FOLOR, I FUEGO LOS KONSUMIRA.
11 SU FRUTO DESTRUIRAS DE LA TIERA,
I SU SEMEN DE ENTRE LOS IJOS DE OMBRE.
12 PORKE ESTENDIERON MAL KONTRA TI;
PINSARON ARTIFISIO, ma NO PODIERON.
13 POR TANTO LOS ARAS TORNAR LA ESPALDA;
tus saetas APARIJARAS EN TUS KUERDAS KONTRA SUS FASES.
14 ENALTESETE, O ADONAY! EN TU FORTALEZA;
KANTAREMOS I SALMIAREMOS A TU BARAGANIA.
salmo 22
1 AL PRIMER KANTADOR SOVRE ELAT ASHAHAR, SALMO DE DAVID.
2 DIO MIO, DO MIO! POR KE ME DESHASTE?
por ke estas LESHOS DE MI SALVASION,
i de LAS PALAVRAS DE MI DJIMIDO?
3 DIO MIO! YAMO DE DIA, I NO RISPONDES;
I DE NOCHE, I NO AY KAYADEZ A MI.
4 MA TU ERES SANTO,
tu KE MORAS entre LOS LOORES DE ISRAEL.
5 EN TI SE ENFIGUZIARON NUESTROS PADRES;
SE ENFIGUZIARON, I LOS ESKAPASTE.
6 A TI ESKLAMARON, I FUERON ESKAPADOS;
EN TI SE ENFIGUZIARON, I NO SE AVIRGUENSARON.
7 MA YO SOY GOZANO, I NO VARON;
RIPODIO DE OMBRES, I MENUSPRESIADO DEL PUEVLO
8 TODOS LOS KE ME VEN ESKARNESEN DE MI;
AVREN EL LAVYO, MENIAN LA KAVESA, diziendo:
9 ESPERO EN ADONAY; KE EL LO ESKAPE;
KE LO ESKAPE, SIENDO KE ENVELUNTO EN EL.
10 MA TU ERES EL KE ME SAKO DEL VIENTRE,
KE ME IZO ESPERAR SOVRE LOS PICHOS DE MI MADRE.
11 SOVRE TI FUE ECHADO DEZDE LA BOLVA;
DEZDE EL VIENTRE DE MI MADRE MI DIO ERES TU.
12 NO TE ALESHES DE MI; PORKE ANGUSTIA ESTA SERKA;
PORKE NO AY KIEN AYUDE.
13 ME RODIARON MUCHOS TOROS;
todos FUERTES DE BASHAN ME ENSERARON.
14 AVRIERON SOVRE MI SU BOKA,
KOMO LEON KE ARIVATA I BRAMA.
15 KOMO AGVA SOY VERTIDO,
I SE ESPARTIERON TODOS MIS GUESOS;
MI KORASON SE A ECHO KOMO SERA,
DISLEENDO SE EN MIDIO DE MIS ENTANYAS.
16 SE SEKO KOMO TIESTO MI FUERSA,
I MI LENGVA SE APEGO A MI PALADAR;
I EN EL PULVO DE LA MUERTE ME POZISTE.
17 PORKE ME RODIARON PEROS;
KOMPANIA DE MALINOS ME ENSERARON;
BURAKARON MIS MANOS I MIS PIES.
18 KONTO YO TODOS MIS GUESOS;
EYOS KATAN i MIRAN A MI.
19 ESPARTEN MIS VESTIDOS ENTRE SI,
I SOVRE MI ROPA ECHAN SUERTE.
20 MA TU, ADONAY, NO TE ALESHES;
FORTALEZA MIA, APRESURATE A MI AYUDA.
21 ESKAPA DE LA ESPADA MI ALMA,
DEL PODER DEL PERO MI VIDA.
22 SALVA ME DE LA BOKA DE LEON:
I ME RESPONDISTE i me eskapaste DE LOS KUERNOS DE
LOS BUFALOS.
23 REKONTARE TU NOMBRE A MIS ERMANOS;
EN MEDIO DE LA KOMPANIA TE ALAVARE.
24 LOS KE TEMESH A ADONAY, ALAVALDO;
TODO EL SEMEN DE YAAKOV, ONRALDO;
I TEMED DE EL , TODO EL SEMEN DE ISRAEL.
25 PORKE NO MENUSPRESIO NI ABURESIO LA AFRESION DEL
AFRESIDO, NI ENKUVRIO SUS FASES DE EL;
I KVANDO ESKLAMO A EL, OYO.
26 DE KONTIGO sera MI LOOR EN LA KOMPANIA GRANDE;
MIS PROMESAS PAGARE DELANTE DE LOS KE LE TEMEN.
27 KOMERAN LOS PROVES, I SE ARTARAN;
ALAVARAN A ADONAY LOS KE LO BUSHKAN;
BIVIRA VUESTRO KOORASON PARA SIEMPRE.
28 SE AKORDARAN I SE TORNARAN A ADONAY TODOS LOS
KAVOS DE LA TIERA;
I SE ENKORVARAN DELANTE DE TI TODOS LOS LINAJES DE
LAS DJENTES.
29 PORKE DE ADONAY ES EL REINO;
I EL ES PODESTADOR ENTRE LAS DJENTES.
30 KOMERAN I SE ENKORVARN TODOS LOS GRUESOS DE
LA TIERA;
DELANTE DE EL SE ARODIYARAN TODOS LOS KE DESIENDEN
AL PULVO; I NINGUNO ABIDIGVARA SU ALMA.
31 SEMEN LE SERVIRA;
SERA KONTADO A ADONAY POR DJERENANSIO.
32 VENDRAN I DENUNSIARAN SU DJUSTIDAD
A PUEVLO KE NASERA, KE el lo IZO.
salmo 23
SALMO DE DAVID
1 ADONAY ES MI PASTOR - NO TENDRE FALTA.
2 EN PASTOS DE ERMUYO ME AZE YAZER;
DJUNTO A AGVAS DE RIPOZO ME GIA.
3 KONFORTA MI ALMA;
ME GIA EN SENDEOS DE DJUSTIDAD POR AMOR DE SU NOMBRE.
4 AUNKE ANDI EN EL VAYE DE SOLOMBRA DE MUERTE,
NO TEMERE DE MAL; PORKE TU ESTAS KONMIGO;
TU VARA I TU VERGA EYAS ME KONORTAN.
5 ORDENAS MEZA DELANTE DE MI EN PREZENSIA DE IS
ANGUSTIADORES;
UNTAS KON AZIETE MI KAVESA; MI VAZO SE REVIERTE.
6 SIERTAMENTE BIEN I MERSED ME SIGIRAN TODOS LOS DIAS
DE MI VIDA;
I RIPOZARE EN LA KAZA DE ADONAY POR LONGURA DE DIAS.
salmo 24
SALMO DE DAVID
1 DE ADONAY ES LA TIERA I SU ENCHIMIENTO'
EL MUNDO I LOS KE MORAN EN EL.
2 PORKE SOVRE LAS MARES EL LA ASEMENTO,
I SOVRE LOS RIOS LA AFIRMO.
3 KIEN SUVIRA AL MONTE DE ADONAY?
I KIEN SE LEVANTARA EN SU LUGAR SANTO?
4 EL LIMPIO DE MANOS, I PURO DE KORASON,
KE NO ALSO SU ALMA A LA VANIDAD,
NI DJURO KON ENGANYO.
5 EL RESIVIRA LA BENDISON DE ADONAY,
I DJUSTIDAD DEL DIO DE SU SALVASION.
6 TAL ES EL DJERENANSIO DE LOS KE LO BUSHKAN;
LOS KE BUSHKAN TUS FASES son YAAKOV. SELA.
7 ALSAD, O FUERTES! VUESTRAS KAVESAS;
I ENSHALSHADVOS, O FUERTES DE SIEMPRE!
I ENTRARA EL REY DE LA GLORIA.
8 KIEN ES ESTE REY DE LA GLORIA?
ADONAY FUERTE I BARAGAN, - ADONAY BARAGAN DE PELIA.
9 ALSAD, O FUERTES! VUESTRAS KAVESAS;
I ALSAD, O FUERTES DE SIEMPRE!
I ENTRARA EL REY DE LA GLORIA.
10 KIEN ES ESTE REY DE LA GLORIA?
ADONAY DE FONSADOS, - EL ES EL REY DE LA GLORIA. SELA.
salmo 25
DE DAVID.
1 A TI, O ADONAY! EMPREZENTO MI ALMA.
2 O DIO MIO! EN TI ME ENFIGUZIO;
NO SEA YO AVIRGONSADO,
NO SE ALEGREN DE MI MIS ENEMIGOS.
3 TAMBIEN TODOS LOS KE ESPERAN EN TI NO SEAN
AVIRGONSADOS;
SEAN AVIRGONSADOS LOS KE FALSAN SIN KAVZA.
4 TUS KAMINOS, O ADONAY! AZME SAVER;
TUS SENDEROS ANBIZA ME.
5 ENKAMINAME EN TU VERDAD, I ANBIZAME;
PORKE TU ERES EL DIO DE MI SALVASION;
A TI ESPERO KADA DIA.
6 AKORDATE DE TUS PIADADES, O ADONAY! I DE TUS
MERSEDES; PORKE SON DEZDE SIEMPRE.
7 DE LOS PIKADOS DE MI MOSIDAD, I DE MIS REVELIOS
NO TE AKORDES; SEGUN TU MERSED AKORDATE DE MI TU,
POR TU BONDAD, O ADONAY!
8 BUENO I DERECHO ES ADONAY;
POR TANTO ANBIZAR A LOS PIKADORES EL KAMINO.
9 ENKAMINARA A LOS UMILDES EN EL DJUISIO;
I ANBIZARA A LOS UMILDES SU KAMINO.
10 TODOS LOS SENDEROS DE ADONAY SON MERSED I VERDAD
A LOS KE GAVRDAN SU FIRMAMIENTO I SUS TESTIMONIOS.
11 POR AMOR DE TU NOMBRE, O ADONAY!
PERDONA MI DELITO; PORKE ES GRANDE.
12 KIEN ES EL VARON KE TEME A ADONAY?
LE ANBIZARA EL KAMINO KE A DE EKUJER.
13 SU ALMA RIPOZARA EN BIEN;
I SU SEMEN ERIDARA LA TIERA.
14 EL SEKRETO DE ADONAY ES PARA LOS KE LE TEMEN;
I SU FIRMAMIENTO PARA AZERLES SAVER.
15 MIS OJOS ESTAN DEKONTINO A ADONAY;
PORKE EL SAKARA DE LA RED MIS PIES.
16 MIRAME, I TEN PIADAD DE MI:
PORKE YO SOY SOLO I DESDICHADO.
17 LAS ANGUSTIAS DE MI KORASON SE ENSANCHARON;
SAKAME DE MIS AFRETOS.
18 MIRA MI AFRESION I MI LAZIRIA;
I PERDONA TODOS MIS PIKADOS.
19 MIRA MIS ENEMIGOS, PORKE SE MUCHIGVARON;
I KON ABURESION DE ADOLME ME ABORESEN.
20 GVARDA MI ALMA, I ESKAPAME;
NO SEA YO AVIRGONSADO, PORKE ME AVRIGO EN TI.
21 PRENEZMIDAD I DERECHIDAD ME GVARDEN;
PORKE A TI ESPERO.
22 REGME, O ADONAY! A ISRAEL DE TODAS SUS ANGUSTIAS.
salmo 26
DE DAVID.
1 DJUZGAME, O ADONAY!
PORKE YO ANDUVI EN MI PRENEZMIDAD;
I EN ADONAY ME ENFIGUZYI; - NO ME RESFUERE.
2 EGZAMINAME, O ADONAY! I PTEVAME;
IZMIRA MIS RINONYES I MI KORASON.
3 PORKE TU MERSED ESTA DELANTE DE MIS OJOS,
I EN TU VERDAD KAMINI.
4 NO ME ASENTI KON VARONES DE VANIDAD;
I KON LOS ke andan ENKUVRIENDOSE NO ENTRARE.
5 ABURESE LA KOMPANIA DE LOS MALINOS;
I KON LOS MALOS NO ME ASENTARE.
6 LAVARE EN INOSENSIA MIS MANOS;
I RODIARE TU ARA, O ADONAY!
7 PARA AZER OYIR KON BOZ DE ALAVANSA,
I PARA REKONTAR TODAS TUS MARAVIYAS.
8 O ADONAY! YO AMI LA MORADA DE TU KAZA,
I EL LUGAR DE LA MORADA DE TU ONRA.
9 NO ADJUNTES KON PIKADORES MI ALMA,
NI KON VARONES DE SANGRES MI VIDA:
10 EN MANOS DE LOS KVALES AY MALECHURIA,
I SU DERECHA ESTA YENA DE REGALOS.
11 MA YO ANDARE EN MI PRENEZMIDAD;
REGMIME, I APIADATE DE MI.
12 MI PIE SE ESTUVO EN DERECHIDAD;
EN LAS KOMPANIAS BENDIZIRE A ADONAY.
salmo 27
DE DAVID.
1 ADONAY ES MI LUZ I MI SALVASION, - DE KIEN TEMERE?
ADONAY ES LA FORTALEZA DE MI VIDA,
DE KIEN ME ESPAVORESERE?
2 KVANDO SE ASERKARON KONTRA MI LOS MALINOS PARA
KOMER MI KARNE,
MIS ANGUSTIADORES I MIS ENEMIGOS A MI,
EYOS SE ENTROPESARON I KAYERON.
3 AUNKE POZAE REAL KONTRA MI, - NO TEMERA MI KORASON;
AUNKE SE LEVANTARE GERA KONTRA MI,
EN ESTO YO ME ENFIGUZIO.
4 UNA koza DEMANDI DE ADONAY, ESTA BUSHKARE:
KE YO MORE EN LA KAZA DE ADONAY TODOS LOS DIAS DE MI
VIDA, PARA MIRAR LA ERMOZURA DE ADONAY,
I PARA REKERER EN SU TEMPLO.
5 PORKE EL ME ESUNDIRA EN SU KAVANYA EN EL DIA
DE MAL; ME ENKUVRIRA EN LO ESKONDIDO DE SU TIENDA;
EN PINYA ME ENALTESERA.
6 I AGORA SE ENALTESERA MI KAVESA SOVRE MIS ENEMIGOS
AL DIRIDOR DE MI;
I SAKRIFIKARE EN SU TIENDA SAKRIFISIOS DEAULASION;
KANTARE I SALMIARE A ADONAY.
7 OYE, O ADONAY! MI BOZ kon ke YAMO;
I TEN PIADAD DE MI, I RISPONDIMI.
8 kvando dishiste: BUSHKAD MIS FASES:
MI KORASON TE DISHO: TUS FASES, O ADONAY! BUSHKARE.
9 NO ENKUVRAS TUS FASES DE MI;
NO APARTES KON FOLOR A TU SIERVO;
MI AYUDA FUYISTE, NO ME DESMAMPARES,
I NO MI DESHES, O DIO DE MI SALVASION!
10 AUNKE MI PADRE I MI MADDRE ME DESHARON,
ADONAY ME REKOJERA.
11 ANBIZAME, O ADONAY!! TU KAMINO;
I GIAME EN SENDERO DE DERECHIDAD A KAVZA DE MIS
ENEMIGOS.
12 NO ME ENTREGES A LA VELUNTAD DE MIS ANGUSTIADORES;
PORKE SE LEVANTARON KONTRA MI TESTIGOS FALSOS,
I LOS KE AVLAN ADOLME.
13 SIERTAMENTE KREYE DE VER LA BONDAD DE ADONAY EN LA
TIERA DE LOS BIVOS.
14 ESPERO A ADONAY;
ESFORSATE, I EL ENFORTESERA TU KORASON;
I ESPERA A ADONAY.
salmo 28
DE DAVID.
1 A TI, O ADONAY! YAMO;
MI PINYA, NO TE KAYES DE MI,
NO SEA KE, se KAYARES DE MI,
YO SEA SIMIJANTE A LOS KE DESIENDEN A LA FOYA.
2 OYE LA BOZ DE MIS ROGATIVAS KVANDO ESKLAMO A TI,
KVANDO ALSO MIS MANOS A TU ORAKULO SANTO.
3 NO ME SUNTRAYGAS KON LOS MALOS,
I KON LOS OVRADORES DE TORTURA,
KE AVLAN PAZ KON SUS KOMPANIEROS,
I MALISIA AY EN SU KORASON.
4 DALES SEGUN SU OVRA,
I SEGUN LA MALISIA DE SUS ECHOS;
SEGUN EL ECHO DE SUS MANOS DALES;
TORNALES SU PAGA.
5 PORKE NO PARAN MIENTES A LAS OVRAS DE ADONAY,
NI AL ECHO DE SUS MANOS,
EL LOS DEROKARA, I NO LOS FRAGVARA.
6 BINDICHO ADONAY, - PORKE OYO LA BOZ DE MIS ROGATIVAS.
7 ADONAY ES MI FORTALEZA I MI ESKUDO;
EN EL SE ENFIGUZIO MI KORASON, I YO FUE AYUDADO;
I SE GOZA MI KORASON, - I KON MI KANTAR LO LOARE.
8 ADONAY ES LA FORTALEZA DE EYOS;
I LA FORTALEZA DE LAS SALVASIONES DE SU UNTADO ES EL.
9 SALVA A TU PUEVLO, I BENDIZE A TU ERIDAD;
I APASENTALOS, I ENSHALSHALOS PARA SIEMPRE.
salmo 29
SALMO DE DAVID.
1 DAD A ADONAY, O IJOS DE FUERTES!!
DAD A ADONAY ONRA I FORTALEZA.
2 DAD A ADONAY LA ONRA DE SU NOMBRE;
ENKURVADVOS A ADONAY KON ERMOZURA DE SANTIDAD.
3 BOZ DE ADONAY SOVRE LAS AGVAS;
EL DIO DE LA ONRA IZO TRONAR;
ADONAY SOVRE AGVAS MUCHAS.
4 BOZ DE ADONAY KON FUERSA;
BOZ DE ADONAY KON MADJESTAD.
5 BOZ DE ADONAY KEVRA ALARZES;
I KEVRO ADONAY LOS ALARZES DE LEVANON.
6 I LOS IZO SALTAR KOMO BIZERO;
LEVANON I SIRION KOMO IJOS DE BUFALOS.
7 BOZ DE ADONAY KORTA FLAMAS DE FUEGO.
8 BOZ DE ADONAY AZE TEMBLAR AL DIZIEERTO;
AZE TEMBLAR ADONAY AL DIZIERTO DE KADESH.
9 BOZ DE ADONAY AZE PARIR A LAS SIERVAS,
I DISNUDA LAS SHARAS;
I EN SU TEMPLO KADA UNO AVLA DE su ONRA.
10 ADONAY ESTUVO ASENTADO EN EL DILUVIO,
I SE ASENTO ADONAY REY PARA SIEMPRE.
11 ADONAY DARA FORTALEZA A SU PUEVLO;
ADONAY BENDIZIRA A SU PUEVLO KON PAZ.
salmo 30
1 SALMO. KANTAR DE ESTRANAMIENTO DE LA KAZA DE DAVID.
2 TE ENSHALSHARE, O ADONAY! PORKE ME ENALTESISTE;
I NO IZISTE A MIS ENEMIGOS ALEGRARSE DE MI.
3 O ADONAY DIO MIO! ESKLAMI A TI, I ME SANASTE.
4 O ADONAY! IZISTE SUVIR DE LA FUESA MI ALMA;
ME ABIDIGVASTE, PARA KE YO NO DESENDIERA A LA FOYA.
5 SALMIAD A ADONAY, SUS BUENOS;
I LOAD A LA MEMBRASION DE SU SANTAIDAD.
6 PORKE UN PUNTO estamos EN SU FOLOR,
LA VIDA intera EN SU FAVOR; EN LA TARDE KEDA EL YORO,
I EN LA MANYANA VIENE KANTAR.
7 I YO DISHI EN MI SEGURIDAD: NO SERA EMUVIDO POR SIEMPRE.
8 O ADONAY! POR TU FAVOR IZISTE ESTAR MI MONTE KON
FORTALEZA; ENKUVRISTE TUS FASES, i YO FUE TURVADO.
9 A TI, O ADONAY! YAMO, - I A ADONAY ROGO.
10 KE PROVECHO AY EN MI SANGRE,
EN DESENDIENDO YO A LA FOYA?
TE LOARA EL PULVO? - DENUNSIARA EL TU VERDAD?
11 OYE, O ADONAY! I APIADATE A MI;
O ADONAY! SE MI AYUDADOR.
12 TU TORNASTE POR MI INDECHA EN BAYLE;
SOLTASTE MI SAKO, I ME SENYISTE DE ALEGRIA:
13 PARA KE SALMIYE A TI mi ONRA, I NO SE KAYE.
O ADONAY DIO MIO! PARA SIEMPRE TE LOARE.