Purim 2009
Kompla
Purim, Purim, Purim lano,
kriza, kriza a la mano
Kon ayuda del Dio alto
Ke no mos aga nada falto
Lo alavo i le kanto
Ke le tenemos ke dever
Despues de la gerra fria
A todos ya les paresia
Ke El kapitalizmo s´enreynaria
I ke istoria se eskaparia
Kon la ultima NATO-viktoria.
Avrid presto los merkados,
Libres, ilimitados i non-molestados,
Sin ninguna regulasion,
O kontrola, has veshalom!
Primitivos no seresh,
Al kapital no ofendesh!
El ya se save komportar,
De si para si se kontrolar,
Solo se va a regular el.
Baza de oro para las banknotas
No es ke hamoridad de las nonas
No ay saraf mas mejor
Ke muestro "Tio Merkado"
El va kontrapezar las banknotas.
(Solo ke no le saldran todas rotas.
Patron del mundo no mos de!)
Esto ke sintieron los rikinyones
Pishin pasaron sus dechiziones
Komo augmentar las adkizisiones
Adelantar las investisiones
Multiplikar sus profuziones
Deshandomos sin iluziones
Kon sus deviza la maldicha:
Para kon para ke se incha,
I los piojos a la fukara, ey!
Entre si s'akonsejaron,
A Ahitofel tambien konvidaron
El kual ansina los ankonsejo:
Para kualo espartir paras
A ovreros oksidentales,
Kistos i mimados? Nunka i no!
Pishin toda la produksion
Eksportarla eksportaron,
A la China la mandaron, Dio!
Loke Djon nunka iziera
Sin vente dolares
Por ora orera
Chin-Chu-Lui alegre koriera
Por vente por semana entera
Sin vikendes i sin fiestas
Sin derechos sosiales
Sin ningunos sindikates.
Dio!
El kapital se va de Ame-rika,
A Azia, la poveretika,
I kon el los repromateriales,
I standardes de fabrikasion.
Despues viene el patron
Mete el produkto al avion
Se lo vende en "aksion"
Aziendose mas rikinyon.
Dio!
En enteros Estados Unidos,
Ni los Kanadelis no son distingidos,
No kedo ni una 'tiketika
Ke meldaria Meyd in Amerika,
De chorapes asta'l chapeo,
Toda la braga i el botonero
Todo viene de la Kina,
De Tayvan o de Meksiko, ey!
I ansina, mi kerido 'rmano,
Lo ke te estava kontando,
Levis ke era simvolo 'Merikano,
El tambien se izo Meksikano,
Ki ansina es dever.
Asta el tokmak de la puerta,
Djuture todo es emportado,
Kenef-kapakes i el tavlado
En Chino avlan de entre si.
Afuera de poka araba,
I miskendad de tekstiles,
Ke dainda son lokales,
Amerika ya non produse
Ningunas kozas materiales,
Solo sit-komes i saytes,
Komo Gugles i Feysbukes,
Softver i deverver,
Dio!
Otra moda ya mos vino,
Kada uno si metio en el tino,
De non guardar mas paras,
En dushekes i madrases,
O basho los parketes, Yok!
Oyendia es otra storia.
Kada uno si tiene un dolariko,
A la bursa se lo yava prestiko.
Para fazerle un buchukito, ken!
I Klinton el ravaniko,
Komo Mashiah ya se vido,
A los alkiladores trayer rehmision
Tuvo el la intension
Disho: A todos daldes kreditos
Ke merken kazas i kazalitos,
Uva leSiyon Goel.
Loke keren los viejikos,
Ya les viene entre s.huenyikos.
Los patrones de las kazas
Asuvieron sus demandas,
Kon la espalda del estado
Kreditos esparte el banko
A todo el mundo i su mujer.
Sin los guesos eskuper
Todos los komio en un dado
El buen de muestro Tio Merkado.
I ansina, mis ermanos,
No ay menester de kontar kuentos largos,
Al kavo a toda la bulumenta,
Mos vino la alta kuenta,
Por lo suyo vino el guerko
Para yevarmos todos kon el
Direktamente al Djinem.
Ke mos kedo de fazer?
Onde vamos mas valer?
No es ora de burlar,
Ay presto ke lavorar,
A los sielos manos alvantar
Diziendo la shevua:
A los proves no desharemos
De provaya ke mueran eyos
La dolarolatria echaremos
Del mal kapitalizmo tornaremos.
Aziendo todos teshuva.
Meted brenas a los rikinyones
Siendo ke por sus miliones
A todos kapak kaji mos kayo.
Azed bondad kon las dos manos,
A miskenikos ayudaldos,
Esperando ke de los sielos,
Esta teshuva mos aersiviran,
i a la kriza la mataran.
Amen veAmen, Sela!
