Kompla de Sifer
eskrita por Eliezer Papo,
a baze de una vieja kompla de Purim
Moto:
Leasiyat Siferim en kes,
velaag laedepsiz yegiat basar.
(a baze de Koelet 12:12)
Grasias al Dio sin estanko,
Por el Djidjo ke no es manko,
Lo alavo i le kanto,
Ke le tenemos mucho dever.
Bivash vos i biva yo,
Bivan todos los Djidios,
Vidas largas al Djidjo,
Ke tanto plazer mos dio.
El Djidjo manda i dize:
Todo Sefaradi ke se avize:
ay ke avlar, no importa loke se dize,
avlen mucho en Djidjo!
Bivash…
Komo vos digo ansi aresh,
En Djidjo muncho avlaresh,
Sus maraviyas kontaresh,
Ke son kozas de saver!
Bivash…
Esto miresh de fazer.
I fazeldo kon gran plazer,
Ke no vos enterre bivos Sifer,
De kaza de Djidio londje.
Bivash…
El arte-kulo ser meldado,
No saltado i no yerrado.
El niyet de Bilam aboltado,
Loke kere este Sifer?
Bivash…
El Sefaradi, si es kayado,
Por muerto ya es kontado,
No se kere mucho avlado,
Ansi esta la koza en a-Ares.
Bivash…
El mioyo tened avierto,
Para entender este segreto,
Porke keren al Djidjo muerto?
Esto se kere presto entender.
Bivash…
Kozas muertas no se matan!
I por muertas no se proklaman!
Los muertos a ken enojan?
Ken se zahmetea i les faze atake?
Bivash…
Tanto dar en ojo i tanto enojo,
Tanta envidia i tanto selo,
Tanta ironia i tanto sarkazmo,
Solo los bivos kauzar pueden.
Bivash…
Es la fidalgia de los Sefaradikos?
Ke no se ven segundikos,
A ningun ombre o grupikos,
Afuera del Dio, ke ansi los faze!
Bivash…
O son las relasiones kon Espanya,
La amor ke esta mos ama,
Su reushita supitanya,
Ke mos aze suvir tambien?
Bivash…
O es l´asuvida del kastilyano,
Ke tiene al mundo konkistado,
Por sienes de miliones esta avlado,
Segundo solo al inglez?
Bivash…
O es su asimijansa kon el Djidjo,
El fakto ke kualseker Djidio,
Pishin s'entiende kon un kristiano,
Sin ke los dos algo troken.
Bivash…
Estamos avlando un kastilyano klasiko,
Konsagrado kon un toke ebraiko,
Enoblesido kon un toke balkaniko,
Klaro ke munchos mos enviden.
Bivash…
Ay unos de afuera,
Ke les entra la sekera,
A ver a los Sefaradim a la kavesera.
Fiko seko su parte es.
Bivash…
Ay darientro otros tantos,
Unos Frankos burakados,
Las narizes a los sielos,
Por avlar un langue minoritaire.
Bivash…
Sus nonas i sus nonikos,
Al Fransez metieron los medjedikos,
Pensaron d'azer se rikos,
Al Djidjo non pueden ver.
Bivash…
Non supieron los zavalikos,
Ke en la bursa de los leshonikos,
Las aksiones de los Frankitos,
Se van a fazer bizer.
Bivash…
Koman agora los entranyos,
A ver la suvida de los kastilyanos,
Uno Djidjo i otro de kristianos,
Ben porat ale ayin Yosef.
Bivash…
A los dos tipos ariva deskritos,
No les kedaron muchos remedikos,
Echar palavras i unos lodikos,
A mozotros ke mos sale.
Bivash…
Dizen mucho mos riimos,
Al sintir al Ladino,
Es porke a las famiyas amimos,
Sin Edip i sus edepsizlikes.
Bivash…
Lengua beya al sintir,
Ke a los muertos aze rebivir,
A las nonas aze suvir,
Memorias buenas suven.
Bivash…
Ay lenguas ke azen yorar,
Otras ke azen keshar,
Esta muestra, sin komparar,
Mos aze luna en kinze.
Bivash…
I loke disho el fitijiko,
Ke no tenemos mucho livriko,
Ya s'ulvido ke muestro hahamiko
Eskrivio en lashon la mas parte.
Bivash…
Todos djente non importante,
Empesando kon los d'avante,
Arambam komo sus komandante,
Eskapando kon el Abravanel.
Bivash…
La konstitusion de la Uma djudia,
Fue eskrita en la Turkia,
Entre Edirne i Sefad la eskrivia,
Muestra korona, Ribi Yosef.
Bivash…
De la produksion de este grupiko,
De la diaspora el luzeriko,
Dezde siempre asta aze piko,
De kontar tambien es dever.
Bivash…
Del Meam loez ke se le kante,
De Komplas de Yosef ke se le konte,
Al Almoznino ke se le mensione,
Todo esto es dever.
Bivash…
Otra koza tiene ulvidado,
Ke somos grupo minoritario,
Komo dize Sinyor Navon,
La noblesa es poka siempre.
Bivash…
Komo no entiende, el miskeniko,
Ke no se mizura kon mizmo piko,
De kinyentos mil un grupiko,
Kon uno vente vezes mas grande.
Bivash…
Tanto a la ora antes de la Destruksion,
De la Shoa i la aniilasion,
Nunka paso La Nasion,
El numero de Mahane Israel.
Bivash…
Malgrado esto son muestros hahamim,
Ke alvantaron la bandiera de los nidahim,
I disheron a Israel shuvu banim.
En Ganeden sus almas esten.
Bivash…
Ay menester ke le avlaras,
De Ham Alkalay i Ribi Bivas,
I de tantos otros mas?
Porke, djanim, adjaba ke te kanses.
Bivash…
Deshemos selo a los selozos,
La envidia a los envidiozos,
Sigiendo amanet de muestros vistozos,
Vamos a bivir muy bien.
Bivash…
Muestra kara sonriente,
La kultura benevolente,
Un Djudaizmo tolerante,
Kon komer i kon bever.
Bivash…
Mas grande premio de ke keres,
Alegria kon loke eres,
Sameah behelko ashir el es,
Komo todos bien lo savesh.
Bivash…
I a muestros enemigos,
Kondolensias por no ser mos,
Kualo ke les faga ke de los sielos,
No los vieron komo zakaim.
Bivash…
Oyir kozas de riyir i kanto,
I ver kozas de enkanto,
Asta kedar en un kanto.
Esto keren los Sefaradim.
Bivash…
Dalde a ken dize: Daka,
I al pazvan kon la toyaka.
En la puerta no metash tranka.
Ke vengan todos a bever:
Bivash…
I en esto muncho inyado
Aspros gasta kon punyado.
El Dio vos da demaziado
I vos keda a dever.
Bivash…
Vengamos a la kumida.
Sea muncha i sin medida.
Mas i mas en la bivida,
Sea muncho el bever:
Bivash…
Gizanderas en las kuzinas,
Desplumando las gayinas.
Kaymak, yigurt kon meyinas
Ke empesen a komer:
Bivash…
Miren de komer pishkado
Frito kocho i asado,
I ke no manke salado,
Porke aze bien bever:
Bivash…
Indianas muy bien asadas,
Pinyonada i almendradas,
Lombos, elguengas aumadas,
Porke azen bien bever:
Bivash…
Galinachos bien asados,
Kavritikos muy bien djirados
I kolos arreyenados,
Para poder mas bever:
Bivash…
Kostiyas de vitela de leche,
Al ke kome le aproveche.
A durmir ke no se eche,
Porke no podra bever:
Bivash…
Karnavetas i salatas,
Todo en platos de platas.
Pichones, poyos i patas,
Ke no deshen de komer:
Bivash…
Mustachudos i pandelones,
Yeva dulse a las nasiones,
I kontaldes las razones,
Ke no burlen del bever:
Bivash…
No bevash vino aguado,
Preto, puro i kolorado,
I blanko muy alavado
No lo deshesh de bever:
Bivash…
I kon esto yo me kazo,
Ke no tenga fey el vazo.
No vistir hadi ni dazo.
Ke ansina es el dever:
Bivash…
Chibukes largos i buenos,
I los vazos siempre yenos
Media ora por lo menos,
Sea de una el bever:
Bivash…
El kafe ke este bien echo,
Ke aze grande provecho
Kita sfuenyo de el lecho,
I demandan a bever
Bivash…
Roga al Dio es estos días,
Mos de munchas alegrías,
I veder sus maraviyas.
Ke presto mo las aga:
Bivash…
Bindicho el Dio El Elion,
Ke mos izo tal salvasion,
Mijorado, la rigmision
Presto mo la deshe ver:
Bivash…
